"Եվրանեսթի" պաշտոնյան դրական է գնահատել Հովիկ Աբրահամյանի հրաժարականը

Այսօր  ՀՀ Ազգային ժողովի նախագահ Հովիկ Աբրահամյանն ընդունել է Եվրախորհրդարանի պատգամավոր, «Եվրանեսթ» ԽՎ-ի համանախագահ Քրիստիան Վիգենինին:

Հովիկ Աբրահամյանն ընդգծել է,  որ  «Եվրանեսթ»-ը չպետք է դիտվի որպես հակամարտությունների քննարկման հարթակ, այլ պետք է ծառայի այն նպատակին, ինչի համար ստեղծվել է:

Քրիստիան Վիգենինը նշել է, որ «Եվրանեսթ»-ում բոլորը հավասար գործընկերներ են, հավասար պատասխանատվություն ունեն կառույցի աշխատանքների համար, եւ ուշադրությունը պետք է կենտրոնացնել այն հարցերի վրա, որոնք միավորում են «Եվրանեսթ»-ի մասնակիցներին: Նրա խոսքով`  որպես «Եվրանեսթ» ԽՎ-ի համանախագահ` ինքն ամեն ինչ կանի, որ չքննարկվեն թեմաներ, որոնք չեն կարող իրենց լուծումը գտնել կառույցի շրջանակներում:

ԱԺ նախագահը տեղեկացրել է նաեւ, որ ինքը ղեկավարելու է ՀՀԿ նախընտրական շտաբը եւ զուտ ընտրարշավի ու ընտրական գործընթացների վրա  կենտրոնանալու նպատակով սեփական նախաձեռնությամբ հրաժարական է ներկայացնելու խորհրդարանի նախագահի պաշտոնից:

Քրիստիան Վիգենինը չափազանց բարձր է գնահատել փաստը, որ  Հովիկ Աբրահամյանը ղեկավարելու է նախընտրական շտաբը եւ այդ կապակցությամբ սեփական նախաձեռնությամբ հրաժարվում է Ազգային ժողովի նախագահի պաշտոնից: