Դալմայի հողօգտագործողները հիշեցնում են

Դալմայի այգիների հողօգտագործողները, արդեն 8 տարի պայքարելով իրենց իրավունքների համար, այսօր առավոտյան բողոքի ակցիա են կազմակերպել Երեւանի քաղաքապետարանի մոտ: Ցուցարարները փորձել են հիշեցնել Երեւանի քաղաքապետի պաշտոնակատար Տարոն Մարգարյանին, որ նա լավատեղյակ է Դալմայի այգիների խնդրին, առավելեւս, որ իրենց ներկայացուցիչների հետ անձամբ հանդիպել է հենց քաղաքապետարանում:

«Ուստի, ակնկալելով նախորդ քաղաքապետի խոստման իրագործումը, մեկ անգամ ես ցանկանում էինք Տարոն Մարգարյանին ներկայացնել այն բոլոր խախտումներն ու անարդարություները, որոնք տեղի են ունեցել մեր առնչությամբ»,- yerkir.am-ի թղթակցին ասաց «Դալմա-Սոնա» հիմնադրամի ՀԽ նախագահ Ռուզաննա Ղազարյան` հիշեցնելով, որ խախտվել են ՀՀ օրենքները եւ միջազգային կոնվենցիաներ, երբ գրեթե 1,5 միլիոն բնակչություն ունեցող Երեւանի կենտրոնում գտնվող միակ զանգվածային կանաչ տարածքը` մոտ 750 հեկտար Դալմայի այգիները, տրվել են անհատ «իշխանիկների»` անհատական կառուցապատման համար:

Դալմայի հողօգտագործողները նշել են, որ իրենք անընդմեջ պայքարի մեջ են` հուսալով, որ, ի վերջո, Երեւանի նոր քաղաքապետի անմիջական օժանդակությամբ, կհասնեն իրենց խախտված իրավունքների վերականգնմանը: