Բարեկիրթ ղեկավարներն ի սկզբանե դատապարտված են

Բարեկիրթ ղեկավարները մեր իրականության մեջ տեղ չունեն եւ ի սկզբանե դատապարտված են. yerkir.am-ի թղթակցի հետ զրույցում անդրադառնալով Երեւանի քաղաքապետ Կարեն Կարապետյանի հրաժարականին` ասաց Հայաստանի քաղաքագետների միության նախագահ Հմայակ Հովհաննիսյանը:

«Բոլոր ճարպիկները, թալանչիները, սրիկաները կուսակցականացվել են եւ եղանակ են ստեղծում այսօրվա Հայաստանում: Սա դառը իրականություն է, այդ իսկ պատճառով Կ. Կարապետյանի նման բարեկիրթ մարդիկ լքում են երկիրը: Բայց ես համոզված եմ, որ նա պահանջված մասնագետ կլինի եւ բարձր դիրք կզբաղեցնի Մոսկվայում»,- ասաց նա:

Քաղաքագետը համոզված է, որ Կարեն Կարապետյանին դրդեցին գնալ այդ քայլին. «Եթե կա մի վարչապետ, որը հանրապետականացվելուց հետո հայտարարում է, որ պետք է կուսակցական մենաշնորհներով առաջնորդվել եւ, եթե կա պրագմատիկ մենեջեր, որն իր արդյունավետությունն ապացուցել է իր գործունեությամբ, ապա, բնականաբար, այս երկուսը չէին կարող համակերպվել, եւ ես դույզն-իսկ չէի կասկածում, որ Կարեն Կարապետյանը հրաժարական կտար»: