ՀԷԿախեղդ Եղեգիս

Վաղը` հոկտեմբերի 27-ին, ՀՀ կառավարությունը որոշում կկայացնի Եղեգիս գետի վրա հերթական փոքր ՀԷԿ-ը կառուցելու մասին: Որոշումը կվերաբերի Եղեգիս գյուղական համայնքին պատկանող 1000 քմ հողատարածքի նպատակային օգտագործման կարգի փոփոխմանը:

Եղեգիսում «Երկիր»-ին հայտնեցին, որ արդեն մեկ տարի է` իրենք մի կաթիլ ոռոգման ջուր չեն ստանում այգիները ջրելու համար. «Ամբողջ ջուրը անցկացրել են տրուբայի մեջ, մեզ էլ ստիպում են, որ միանանք ՋՕԸ-ին եւ մեկ խորանարդ մետրի համար մուծենք 11 դրամ»,- ասացին  եղեգիսցիները եւ հավելեցին. «Չհասկացանք` դարերով էս գետը մեր քթի տակով է անցնում, եւ գետի ջուրը հասցնում են Ռինդ ու Չիվա, իսկ մենք ջուր չունենք: Մարդիկ, սեփականաշնորհելով գետը, մեզանից գումար են պահանջում, որ ջուր տան»:

Ի դեպ, Եղեգիսը համարվում է  ՀԷԿ-երով ամենածանրաբեռնված գետը Հայաստանում, քանի որ ՀՀ հանրային ծառայությունները կարգավորող հանձնաժողովը տարբեր ընկերությունների 6 փոքր ՀԷԿ կառուցելու արտոնագիր է տրամադրել: Պարզվում է` եւս մեկ արտոնագիր հանձնաժողովը տրամադրվել է Եղեգիս գետի վրա կառուցված ոռոգման ջրատարի, մի արտոնագիր էլ` Եղեգիսի վտակ` Կարակայայի վրա ՀԷԿ կառուցելու համար: Այսինքն` շուտով Եղեգիսի ջրային ավազանում կհաշվառվի 8 փոքր ՀԷԿ: