Երկրաշարժ` Վան քաղաքում

ՀՀ արտակարգ իրավիճակների նախարարությունից տեղեկացնում են, որ այսօր Թուրքիայում տեղի է ունեցել 6.4 մագնիտուդ  ուժգնությամբ երկրաշարժ։ Եվրոպական-Միջերկրական սեյսմոլոգիական կենտրոնը տեղեկացնում է, որ երկրաշարժի էպիկենտրոնը գտնվում է Վան քաղաքի մոտակայքում` 47 կմ խորության վրա, իսկ ուժգնությունն էպիկենտրոնային գոտում կազմել է 9-10 բալ:

Թուրքիայի արեւելքում երկրաշարժի ուժգնությունը եղել է 7,3 բալ:

Ըստ CNN Turk-ի` նախնական տվյալներով Վան քաղաքում կան ավերածություններ, մասնավորապես` հաղորդվել է 7 հարկանի շենքի փլուզման մասին։ Փլատակների տակ մարդիկ կան։ Արդեն փլատակներից դուրս է բերվել եւ հիվանդանոցներ տեղափոխվել 50 մարդ։

Թուրքիայի վարչապետ Ռեջեփ Թայիփ Էրդողանը չեղյալ է հայտարարել բոլոր ծրագրերը եւ ուղեւորվել է Վան։ Որոնողափրկարարական աշխատանքներին միացել են նաեւ տեղի զինվորականները։

Տեղեկություններ կան, որ երկրաշարժը զգացվել է նաև Արարատյան դաշտավայրում, Կոտայքի, Արագածոտնի եւ Գեղարքունիքի մարզերում: