Կադաֆիի թիկնապահը` գնդապետի կյանքի վերջին պահերի մասին

«Ալ Արաբիա» արբանյակային հեռուստաընկերության ցուցադրած տեսանյութում Լիբիայի նախկին ղեկավար Մուամար Կադաֆին ողջ է, բայց` արդեն վիրավոր:

«Մի խումբ համախոհների հետ գնդապետ Կադաֆին որոշել էր Սիրտ քաղաքից տեղափոխվել  Ջարիֆ թաղամասը, երբ նորից շրջափակման մեջ հայտնվեցինք»,-  հեռուստաընկերության հետ հարցազրույցում ասել է Կադաֆիի անվտանգության ծառայության նախկին ղեկավար Մանսուր Դաոն: Նրա հավաստմամբ` իրենց բոլոր մեքենաները ոչնչացվել են, ստիպված բաժանվել են խմբերի:

«Մենք ոտքով քայլեցինք դեպի Ջարիֆ: Ես Կադաֆիի եւ պաշտպանության նախարարի հետ էի, մեզ էին միացել նաեւ մի խումբ թիկնապահներ: Փոխհրաձգության ժամանակ ես վիրավորվեցի եւ կորցրի գիակցությունս: Դրանից հետո ոչինչ չեմ հիշում»,- նշել է Մանսուր Դաոն:

Անվտանգության նախկին ղեկավարը խոստովանում է , որ Ազգային անցումային խորհրդի ներկայացուցիչները լավ են վերաբերվում իրենց. «Վիրավոր Կադաֆիին բժշկական օգնություն ցուցաբերեցին»: Սակայն տեսանյութից պարզ երեւում է, որ Մանսուր Դաոն աչքի տակ կապտուկ ունի:

Ազգային անցումային խորհրդի տվյալներով` Մուամար Կադաֆիին հիվանդանոց տեղափոխելիս փոխհրաձգության հետեւանքով գլխից վիրավորվել է, որն էլ դարձել է նրա մահվան պատճառը: