"Ժառանգությունը" Զոյա Թադեւոսյանի ասածները չի մեկնաբանում

Լրագրողների հետ հանդիպման ժամանակ «Ժառանգություն» կուսակցության նախկին անդամ Զոյա Թադեւոսյանը, ով այժմ ՀԱԿ-ի անդամ է, հայտարարեց, որ «Ժառանգություն»-ը 5 հոգանոց կուսակցություն է, կեղծ ընդդիմություն, էլեկտորատ էլ չունի»:

Չնայած նման կոշտ գնահատականներին` «Երկիր»-ի թղթակիցը «Ժառանգություն»-ից մեկնաբանություններ ստանալ չկարողացավ: ԱԺ «Ժառանգություն» խմբակցության պատգամավոր Լարիսա Ալավերդյանը առհասարակ հրաժարվեց խոսել, Զարուհի Փոստանջյանն էլ հորդորեց ասածները չտպագրել:

Փորձեցինք մեկնաբանություններ ստանալ կուսակցության մամլո խոսնակ Հովսեփ Խուրշուդյանից եւ նախեւառաջ հետաքրքրվեցինք, թե ինչո՞վ է պայմանավորված կուսակցության գործիչների նման լռությունը նախկին կուսակից ընկերոջ կոշտ հայտարարությունների վերաբերյալ:

«Եթե որեւէ լուրջ քաղաքական գործիչ նման հայտարարություններ աներ, մենք անպայման կանդրադառնայինք եւ կմեկնաբանեինք: Այդ անձնավորության ասածները մենք չենք մեկնաբանում»,- հայտարարեց կուսակցության մամլո խոսնակը:

Նշենք, որ էլեկտրոնային պարբերականներից մեկին տված հարցազրույցում ԱԺ «Ժառանգություն» խմբակցության պատգամավոր Արմեն Մարտիրոսյանն ասել է, որ Զոյա Թադեւոսյանը քաղաքական պատվեր է կատարում: