Սարկոզին Ադրբեջանում 2.5 ժամ է մնացել

Հարավկովկասյան այցի շրջանակներում Ֆրանսիայի նախագահ Նիկոլա Սարկոզին Բաքվում մնացել է ընդամենը 2.5 ժամ: Սա Ադրբեջանի պատմության մեջ ամենակարճաժամկետ նախագահական այցն է. գրում է ադրբեջանական contact.az էլեկտրոնային պարբերականը:

Սարկոզին հասցրել է այդ ժամանակահատվածում առանձնազրույց ունենալ նախագահ Իլհամ Ալիեւի հետ, նաեւ նրա կնոջը հանձնել Պատվո լեգեոնի շքանշան: Այնուհետեւ Սարկոզին ճաշել է Ալիեւի հետ, մասնակցել ֆրանսիական դպրոցի բացման արարողությանը: Տեղական ժամանակով 17:00-ին Սարկոզին արդեն եղել է Վրաստանում:

Կայքը ուշադրություն է հրավիրում այն հանգամանքին, որ Սարկոզին Ադրբեջանում մնաց 2.5 ժամ, մինչդեռ «Հայաստանում` 2 օր, այցելեց Ցեղասպանության հուշահամալիր, ավելին` բարձրաձայնեց Ցեղասպանության միջազգային ճանաչման մասին»:

Ֆրանսիայի նախագահի նման պահվածքը ադրբեջանական կայքը պայմանավորում է 2012-ի ընտրություններով. Սարկոզին ցանկանում է ստանալ 500 հազար ֆրանսահայերի ձայները: