Սիրիայում սպանվել է Գերագույն մուֆթիի որդին

Սիրիայում սպանվել է երկրի Գերագույն մուֆթի Ահմեդ էդ Դին Հասունի որդին` Սարիա Հասունը: Բացի նրանից` Հալեպի համալսարանի մոտակայքում մահացու վերք է ստացել պատմության պրոֆեսոր Մուհամեդ ալ Օմարը. տեղեկացնում է Xinhua գործակալությունը:

Որդու սպանության կապակցությամբ լրագրողների հարցերին պատասխանելով` Գերագույն մուֆթին ասել է, որ երկրում ճգնաժամը հաղթահարված է, իսկ տեղի ունեցածը արտաքին միջամտության հետեւանք է:

Սիրիայի հոգեւոր առաջնորդ Հասունը պաշտպանում է երկրի նախագահ Ասադին, նա սիրիացիներին կոչ է արել արտաքին ինտերվենցիայի դեպքում, կյանքը չխնայելով, պայքարել զավթիչների դեմ:

Սիրիայի իշխանությունները հայտարարում են, որ վերջին օրերին երկրի ավազակային ընդհատակը որսի է դուրս եկել մտավորականության դեմ: Նրանց զոհերի թվում են բժիշկներ, միջուկային ֆիզիկայի բնագավառի մասնագետներ: Իշխանությունները պնդում են, որ նրանց ոչնչացնելու հրամանները ստացվում են դրսից: