Անկախությունը` ընդդիմադիր պատգամավորների աչքերով

ԱԺ ՀՅԴ խմբակցության պատգամավոր Լիլիթ Գալստյանը, կարեւորելով անկախության բացառիկ արժեքն ու այն համարելով մեր ժողովրդի պատմության երազային ձեռքբերում, որպես նվաճում առանձնացրեց Արցախյան ազատամարտը, սակայն ցավով արձանագրեց, որ անցնող 20 տարիների ընթացքում մենք այնքան էլ շատ բան չենք արել անկախության ու պետականության գաղափարներն արժեւորելու համար: «Այսօր ունենք մի երկիր` արժեքների դեգրադացիայի մեջ տապակվող, կոռուպցիայի մեջ «փթթող», մարդու իրավունքները ոտնահարող, եւ դրա մեղավորը ոչ թե քաղաքացին է, այլ իշխանությունը»,- լրագրողների հետ հանդիպման ժամանակ ասաց նա:

Պատգամավորը հայտարարեց, որ ստեղծված իրավիճակի պատասխանատուն վարչական իշխանությունն է, որը չունի ո'չ բարոյական, ո'չ էլ հոգեւոր հեղինակություն եւ չի կարողանում օգտագործել ժողովրդի մարդկային ու գիտական ռեսուրսը: «Մենք ընդամենը կարողացել ենք արեւելյան տիպի կլանային մի երկիր կառուցել, որտեղ օրենքներ ենք ստեղծում բոլորի համար, բացառություններ` մի նեղ շրջանակի համար, իսկ մեր օրակարգի հիմնական խնդիրն իշխանությունը զավթելն ու պահելն է»,- հայտարարեց Լիլիթ Գալստյանը:

«Ժառանգություն» խմբակցության քարտուղար Լարիսա Ալավերդյանի պնդմամբ` Հայաստանում ոչ թե կլաններ են ձեւավորվել, այլ ամեն ինչ մնացել է մի քանի ընտանիքների ձեռքում, ինչն ավելի վատ է: «Կլանը կարող է ընդգրկել այլ ընտանիքներից մարդկանց, իրականում դա ընտանիքների կողմից զավթվածը ոչ միայն նյութական ռեսուրսն է, այլ բոլորիս պատկանող հնարավորությունները եւ իրավունքները»,- հայտարարեց նա:

Այնուհանդերձ, «Ժառանգության» պատգամավորը խորհուրդ է տալիս տոնական տրամադրությամբ նշել օրը, դրանից դասեր քաղել ու փորձել հասկանալ` ինչո՞ւ անկախություն ձեռք բերելը ստացվեց, կարգուկանոն հաստատելը` ոչ: Իսկ խնդիրը, Լարիսա Ալավերդյանի համոզմամբ, պետք է փնտրել ոչ թե դրսում, այլ ներսում: «Եկեք անենք այնպես, որ մեր երանելի երկրում, ի վերջո, երանելի պետական համակարգ լինի: Դա արդեն մեզանից է գալիս»,- ասաց նա: