Հայաստանը` կրասնոդարցի երեխաների աչքերով (տեսանյութ, լուսանկարներ)

Կրասնոդարի թիվ 23 գիմնազիայում անցկացվել է տարբեր երկրների եւ դրանց մշակույթներին նվիրված օր: Ներկայացված երկրների շարքում (Հունաստան, Ճապոնիա, Գերմանիա, Հնդկաստան, ԱՄՆ եւ այլն) նաեւ Հայաստանն էր:

Դասարաններին երկրները բաժին էին ընկել ոչ սեփական ընտրությամբ, այլ վիճակահանությամբ, սակայն 9-րդ ա դասարանը Հայաստանը ներկայացրել է աշակերտներից մեկի վճռականության շնորհիվ. մեկ քառորդ հայկական արյամբ պատանին խնդրել էր վիճակահանությամբ իրենց բաժին հասած Եգիպտոսի փոխարեն իրենց տալ Հայաստանը ներկայացնելու հնարավորություն. տեղեկացնում է «Երկրամասը»:

Երեխաները մեծ պատասխանատվությամբ էին պատրաստվել մրցույթին. դասարանը զարդարել էին հայկական ոգով` Հայաստանի Հանրապետության դրոշներ, Հայկ Նահապետի, Տիգրան Մեծի եւ այլ հերոսների, հուշարձանների ու եկեղեցիների գունավոր նկարներ, հուշանվերներ, գրքեր, նաեւ հայկական մրգեր:

Իսկ մրցութային օրը երեխաները ներկայացրել են սոչիաբնակ հայազգի բանաստեղծ Գրիգոր Մազլումյանի բանաստեղծությունները, պարել են քոչարի, հանդիսատեսին պատմել հայ ժողովրդի պատմությունից, նույնիսկ հայկական բաղադրատոմսով թխվածք թխել: Ելույթն ավարտվել է «Հայաստան» սլայդ-շոուով, որում ներկայացված է եղել ոչ միայն Հայաստանի Հանրապետությունը, այլեւ Արեւմտահայաստանը եւ Արցախը:

«Հայերի» ելույթը ողջունվել է բուռն ծափահարություններով, «Հա-յաս-տան» վանկարկումներով: Սակայն, ցավոք, «մերոնք» զբաղեցրել են երկրորդ տեղը: Առաջին տեղը շնորհվել է Հնդկաստանին. նրանք անհերքելի փաստարկ են ունեցել` կենդանի վիշապ օձ: