Նայիր աշխարհին` երեխան գրկին կնոջ աչքերով

Այսօր տեղի ունեցավ Մոր և մանկան առողջության դաշինքի հուշագրի ստորագրման արարողությունը, որի նպատակով էլ շուրջ 44 ՀԿ-ներ և քաղաքացիական հասարակության ներկայացուցիչներ մասնակցեցին դաշինքի ընդհանուր ժողովին:

Ինչպես ներկայացրեց ՀՀ առողջապահության նախարարության ներկայացուցիչ Կարինե Սարիբեկյանը, Հայաստանը դասակարգված է «դժվար հասանելի» որակման մեջ, և «հեշտ հասանելի» կարգավիճակի հասնելու համար անհրաժեշտ է կենտրոնացնել առկա ռեսուրսները: «Մենք այդ հարցում ունենք բաց դաշտ, որը պետք է լրացնեն ՀԿ-ները, որպեսզի կարողանանք հասնել մեր նպատակին»,- ավելացրեց նա:

Մոր և մանկան առողջության հայկական դաշինքը կոչված է միավորելու Հայաստանում գործող, մոր և մանկան առողջության խնդիրներով զբաղվող այն տեղական և միջազգային քաղաքացւական հասարակության կառույցներին, որոնք նպատակ ունեն նպաստել մոր և մանկան առողջության պահպանման և բարելավման գործին Հայաստանում:

Համալսարանական կրթությամբ կանանց ասոցիացիայի նախագահ Ջեմմա Հասրաթյանը նշեց, որ մոր և մանկան առողջությունը, նախևառաջ, մեր ազգի առողջությունն է և անվտանգությունը: «Հուշագրի ստորագրումը կօգնի համապատասխան աշխատանք տանել այս ոլորտում և վերահսկել առողջապահական համակարգի աշխատանքը»,- մեկնաբանեց նա` հերկայացնելով իրենց կարգախոսը` «Նայիր աշխարհին` երեխան գրկին կնոջ աչքերով»: