Կոտրված սիրտը` ախտորոշում

Սրտաբանները նոր տերմին ունեն` կոտրված սրտի սինդրոմ, որը զարգանում է ուժեղ հոգեկան ապրումների եւ սթրեսի ֆոնին: Գիտականորեն տերմինը կոչվում է տակոցուբո կարդիոպատիա: Փաստորեն, սթրեսի եւ հոգեկան ծանր ապրումների հետեւանքով տեղի է ունենում սրտամկանի կրճատման հանկարծակի թուլացում, արդյունքում` մի քանի անգամ ավելանում է կաթվածի եւ սրտի անբավարարության սպառնալիքը: Այս հետազոտության արդյունքները տպագրվել են «Բրիտանական բժշկական ամսագրում»:

Այսպես` երեխային կորցրած ծնողները մահանում են 4 անգամ ավելի շատ, քան նրանք ովքեր, նման ցնցում չեն ունեցել: Նույն արդյունքի է հանգեցնում ամուսնու կամ կնոջ մահը:

Կոտրված սրտի սինդրոմի պատճառը միայն հոգեբանական չէ: Ծանր ապրումները թուլացնում են օրգանիզմի իմունիտետը, ինչի հետեւանքով մեծանում է սովորական մրսածությունից թոքաբորբով հիվանդանալու կամ նույնիսկ ուշադրության պակասից ավտովթարի ենթարկվելու հավանականությունը: Այդ պատճառով մասնագետները համարում են, որ ծանր կորուստ ունեցած մարդիկ մոտ 1 տարի պետք է գտնվեն սրտաբանները եւ հոգեբանների հսկողության տակ: