Ռուսաստանցիների 54 տոկոսը չի հավատում արդար ընտրություններին

Ռուսաստանցիների կեսից ավելին` 54 տոկոսը, համոզված է, որ դեկտեմբերին Ռուսաստանում ոչ թե ընտրություններ, այլ ընտրությունների իմիտացիա է լինելու: Մարդիկ կարծում են, որ Պետդումայի պատգամավորական տեղերը բաշխվելու են իշխանությունների կողմից:

«Լավանդա» սոցիոլոգիական հետազոտությունների կենտրոնն իր ուսումնասիրությունը կատարել է օգոստոսի 19-23-ը 600 հոգու շրջանում` 130 բնակավայրում: Ուսումնասիրության սխալականությունը չի գերազանցում 3.4 տոկոսը:

Ինչպես հաղորդում է «Ինտերֆաքսը», հարցվածներից յուրաքանչյուր երկրորդը կանխատեսում է, որ նախընտրական փուլում կիրառվելու են «կեղտոտ մեթոդներ»` հնարավորինս շատ ձայներ ստանալու համար:

Հարցվածների 62 տոկոսն էլ վստահ է, որ մանիպուլյացիաներ եւ լցոնումներ են լինելու ընտրությունների ժամանակ:

Արդար եւ ազնիվ ընտրությունների հույս ունի հարցվածների ընդամենը 32 տոկոսը: Իսկ 14 տոկոսը վստահ է, որ ոչ մի խախտում չի լինելու: