Մերկելն ամենաազդեցիկ կինն է

Գերմանիայի 57-ամյա կանցլեր Անգելա Մերկելը գլխավորում է Forbes-ի` աշխարհի ամենաազդեցիկ 100 կանանց ցուցակը: Նա կարեւոր դերակատարություն ունի համաշխարհային տնտեսության զարգացման գործում` զբաղվելով եվրոյի կայունացմամբ: Մերկելը ամենազդեցիկ կին է համարվել նաեւ 2006-2009 թվականներին:

Նախորդ տարի այս ցուցակը գլխավորում էր ԱՄՆ նախագահ Բարաք Օբամայի կինը` Միշել Օբաման. հաղորդում է Reuters-ը:

Երկրորդ տեղում ԱՄՆ պետքարտուղար Հիլարի Քլինթոնն է. Forbes-ը գնահատել է նրա ճիշտ ռազմավարությունը Մերձավոր Արեւելքում տեղի ունեցած հեղափոխությունների ժամանակ:

Երրորդ տեղում Բրազիլիայի նախագահ Դիլմա Ռոուսեֆն է. նա առաջին կինն է ողջ պատմության ընթացքում, որ նախագահում է հսկայական լատինաամերիկյան երկիրը:

Ցուցակում ամենաերիտասարդ ազդեցիկ կինը Լեդի Գագան է, ով զբաղեցնում է 11-րդ տեղը, իսկ ամենածերը` Բրիտանիայի թագուհի Ելիզավետա Երկրորդը` 49-րդ հորիզոնական:

Ցուցակում ընդգրկված կանանց միջին տարիքը 54 է: Բոլոր կանանց ունեցվածքը, միասին վերցրած, կազմում է 30 տրիլիոն դոլար: Նրանցից միայն 22-ը ամուսնացած չեն: