Նամակը տեղ է հասել 69 տարի անց

Պյատիգորսկ քաղաքի բնակչուհի Նինա Կուզմենկոն նամակ է ստացել, որը դեռեւս 1942 թվականին ուղարկել էր նրա հարազատ հորեղբայր Միքայել Խաչիկյանը:

Ինչպես տեղեկացնում է Ставропольская правда թերթը, պատերազմի ժամանակ ուկրաինական Կամենեց-Պոդոլսկ քաղաքում հիտլերականները բռնագրավել էին խորհրդային բանակի փոստը եւ խնամքով պահպանել բոլոր նամակները՝ համոզված, որ հակառակորդի անձնական նամակագրությունն անգամ արժեք է ներկայացնում: Հետագայում նամակները տեղափոխել էին Վիեննա, որտեղ էլ դրանք հայտնաբերվել էին մեկ տարի առաջ ու վերադարձվել Ուկրաինա:

Կիեւի Հայրենական մեծ պատերազմի թանգարանի աշխատակիցներին էլ որոշել են դրանք առաքել հասցեատերերին:

Միքայել Խաչիկյանի նամակը գրված էր հայերեն: Հարազատների խնդրանքով այն թարգմանել է տեղի հայկական եկեղեցու քահանան:

Թերթը նաեւ գրում է, որ Միքայել Խաչիկյանը զոհվել է Վորոնեժ քաղաքի համար մղված մարտերում եւ թաղվել է տեղի եղբայրական գերեզմանատանը: