Գերմանիայի օմբուդսմենը ցնցված է Ադրբեջանում տեսածից

Ադրբեջանում ամենուրեք տեղի է ունենում քաղաքացիների իրավունքների խախտում. հայտարարել է Գերմանիայի օմբուդսմեն Մարկուս Լենինգը, ով պաշտոնական այցով գտնվում էր Բաքվում:

Ինչպես տեղեկացնում է Contact.az-ը, երեկ տեղի ունեցած ճեպազրույցում նա հայտարարել է, որ իր եռօրյա այցի նպատակը մարդու իրավունքների դրության մասին տեղեկանալն էր, սակայն, ինչպես պարզվել է, այցն անհաջող էր սկսվել: Նախ Լենինգին չեն թույլատրել հանդիպել դատապարտյալ, երիտասարդ ակտիվիստ Բախտիար Հաջիեւի հետ:

«Մենք կես ժամ կանգնել ենք բանտի դարպասների մոտ, որից հետո մեզ հայտնեցին, որ արդարադատության նախարարությունը համաձայնություն չի տվել այդ հանդիպման համար: Չնայած երկու շաբաթ առաջ ես հայտնել էի Հաջիեւին տեսնելու իմ ցանկության մասին»,- ասել է Լենինգը` ավելացնելով, որ ինքը դա որակում է որպես մարդու իրավունքների կոպիտ խախտում:

Նա քննադատել է Բաքվում ապրիլի 2-ին անցկացված բողոքի ակցիաների մասնակիցների ձերբակալությունները եւ անհանգստություն հայտնել բռնությունների աճի մասին տեղեկությունների առնչությամբ:

Լենինգը նշել է, որ ցնցված է Ադրբեջանում տեսածից: