Թե ինչու հաքերին կողոպտել չի կարելի

Բրիտանացի Գրեյգ Մարտինը Facebook-ի միջոցով գտել է գողին, ով Լոնդոնում տեղի ունեցած անկարգությունների ժամանակ թռցրել էր իր նոթբուքը:

Ինչպես հաղորդում է BBC-ն, անցյալ շաբաթ տեղեկատվական տեխնոլոգիաների անվտանգության հարցերով զբաղվող մասնագետ Գրեյգ Մարտինի տնից գողացել են Macbook Pro նոթբուքն ու այլ իրեր:

Գրեյգն իր համակարգչում տեղադրել էր հատուկ ծրագիր, որի միջոցով հնարավոր է հետեւել համակարգչի տեղաշարժին եւ դրա միջոցով էլ նա կարողացել է գտնել գողի Facebook-յան տվյալները:

Գրեյգն իր բլոգում արված «Թե ինչու չի կարելի կողոպտել հաքերին» գրառման մեջ պատմում է, որ գողը նախ կրոնական ինչ-որ տեսահոլովակներ է դիտել, հետո` ավոտմեքենաների կայքեր, ապա մտել է Facebook: Այստեղից էլ Գրեյգն իմացել է նրա անուն-ազգանունը, տեսել նրա լուսանկարները:

Գողի` 18-ամյա Սոհելի Խալիլֆարի տվյալները Գրեյգը փոխանցել է ոստիկանությանը: Ուրբաթ օրը տեղի է ունենալու այս գործով դատական նիստը: