Հաքերները գողացել են ՆԱՏՕ-ի փաստաթղթեր

Anonymous հաքերային խումբը պնդում է, որ իրենց հաջողվել է կոտրել ՆԱՏՕ-ի համակարգիչների պաշտպանության համակարգը եւ մեծ քանակությամբ գաղտնի փաստաթղթեր ձեռք բերել:

Twitter-ի իր էջում խումբը PDF ֆայլ է տեղադրել` «ՆԱՏՕ. ծառայողական օգտագործման համար» անունով: Դրանում «գաղտնի» մակագրությամբ փաստաթղթեր են, այ թվում` դաշինքի` Կոսովոյում անցկացրած գործողությունների վերաբերյալ: Սակայն փաստաթղթերից մեկն ավելի ուշ հեռացվել է հոսթինգից:

Anonymous-ը հայտարարում է, որ իրենց կողմից անպատասխանատվություն կլինի գողացված տվյալների մեծ մասի հրապարակումը, սակայն խոստանում են որոշ հետաքրքիր տեղեկություններ ներկայացնել:

ՆԱՏՕ-ն դատապարտել է իր կայքի վրա կիբերհարձակումը: