Պետռեգիստրում կոռուպցիան նվազել է, հերթերը` ավելացել

Արդարադատության նախարարության պետական ռեգիստրի գործակալությունում, ուր ներդրվել է էլեկտրոնային գրանցման միասնական եւ մեկ պատուհանի համակարգի սկզբունքը, էլեկտրոնային ծառայություններից օգտվողների տեսակարար կշիռը դեռեւս շատ փոքր է եւ չի գերազանցում ընդհանուր ձեռնարկությունների 10 տոկոսը:

Կառավարության այսօրվա նիստում տեղեկացնելով այդ մասին` ՀՀ վարչապետ Տիգրան Սարգսյանը նշեց, որ էլեկտրոնային գրանցումից մինչ այս պահն օգտվել է ընդամենը 80 հոգի, մինչդեռ ծառայությունը հարմարավետ է եւ հնարավորություն է տալիս 10-15 րոպեի ընթացքում գրանցվել ե'ւ որպես իրավանաբական անձ, ե'ւ որպես անհատ ձեռներեց:

Վարչապետը նաեւ նշեց, որ թեեւ կոռուպցիոն ռիսկերն այս ոլորտում կտրուկ նվազել են եւ չեն գերազանցում 1,4 տոկոսը, սակայն դեռեւս առկա են դժգոհություններ, որոնք վերաբերում են սպասարկման որակին ու հերթերին:

Արդարադատության նախարարությանը հանձնարարվեց քննարկել պետռեգիստրին եւս մեկ տարածք հատկացնելու հարցը: