"Արմավիա". ամռանը զեղչեր չեն լինում

Միջպետական չվերթերի տոմսերի գները ամռանը չեն թանկանում, պարզապես էժան տոմսերն են սպառված լինում: Այսօր լրագրողների հետ հանդիպման ժամանակ այս մասին ասաց «Միկա Լիմիթեդ» հոլդինգի սեփականատեր Միխայիլ Բաղդասարովը: Հոլդինգը ներառում է «Արմավիա» ընկերությունը:

Նա բացատրեց, որ տոմսերը լինում են էժան, միջին արժողության եւ շատ թանկ: Քանի որ ձմռանը արտերկիր մեկնողների թիվն ավելի քիչ է, ապա էժան տոմսերն արագ չեն սպառվում, իսկ ահա տաք եղանակին, մասնավորապես` հուլիս-օգոստոս ամիսներին շուկայում մնում են միայն թանկ տոմսերը:

Իսկ եթե ամռանը ցանկանում ես արտերկիր մեկնել` ավելի քիչ ծախսելով, ապա տոմսը պետք է ձեռք բերել մեկնելուց երեք ամիս առաջ:

Մ. Բաղդասարովը նշեց, որ ավելացվել են Մոսկվայի չվերթերը, նաեւ բացվել են նոր չվերթեր` դեպի Մադրիդ, Լիոն, Բարսելոնա. «Պլաններ կային, ավելի շատ չվերթեր բացելու, սակայն պահանջարկն այդքան մեծ չէ»:

Հարցին, թե, արդյոք, նախատեսվո՞ւմ են զեղչեր, Մ. Բաղդասարովը պատասխանեց. «Իսկ ամռանը զեղչեր չեն լինում»: