Վիլիաշ-Բոաշը պաշտոնապես գլխավորեց ''Չելսին''

Լոնդոնի «Չելսիի» պաշտոնական կայքը տեղեկացնում է պորտուգալացի մասնագետ Վիլիաշ-Բոաշի` ակումբի գլխավոր մարզիչ նշանակվելու մասին:

Փորձենք կարճ ներկայացնել այն մարդուն, որն, ըստ մասնագետների, համարվում է աշխարհի լավագույն մարզիչը:

Անդրե Վիլիաշ-Բոաշը ծնվել է 1977 թվականի հոկտեմբերի 17-ին Պորտուգալիայի Պորտո քաղաքում:

Բոաշի կյանքում մեծ դեր է խաղացել Բոբի Ռոբսոնը, հենց նա է պորտուգալացու մեջ նկատել մարզչական տաղանդը և նրան 17 տարեկան հասակում ուղարկել մարզչական որակավորման դասընթացների:

Մարզչական որակավորում ստանալուց հետո Բոաշը 19 տարեկան հասակում սկսել է մարզել «Պորտուի» երիտասարդական կազմը:

2000 թվականին 21-ամյա Անդրեն նշանակվել է Վիրջինյան կղզիների ֆուտբոլի հավաքականի գլխավոր մարզիչ` այդպիսով դառնալով ազգային հավաքականների պատմության մեջ ամենաերիտասարդ մարզիչը:

2003 թվականին «Պորտուի» ղեկին նստեց այն ժամանակ անհայտ Ժոզե Մոուրինիոն և Բոբի Ռոբսոնի խորհրդով իրեն օգնական վերցրեց պատանի Բոաշին:

Մինչև 2009 թվականը Անդրեն գնաց Մոուրինիոյի հետևից նախ` «Չելսի», այնուհետև` «Ինտեր»:

Այսքան փորձ կուտակելով միայն 2009 թվականին` Բոաշն իր ուսերին վերցրեց մեծ պատասխանատվություն` ստանձնելով պորտուգալական «Ակադեմիկայի» գլխավոր մարզչի պաշտոնը:

Այդ ժամանակ «Ակադեմիկան» գտնվում էր վտանգավոր գոտում և պայքարում էր բարձրագույն լիգայում մնալու համար:

Բոաշը նախ առաջնությունն ավարտեց 11-րդ հորիզոնականով, այնուհետև ակումբի հետ հասավ մինչև երկրի գավաթի կիսաեզրափակիչ:

2010 թվականին Վիլիաշ-Բոաշը առաջարկ ստացավ «Պորտուից» և ընդունեց այն: Ինչպես ցույց տվեց ապագան «վիշապների» ղեկավարությունը չէր սխալվել գլխավոր մարզչի ընտրության հարցում:

Նախ «Պորտուն» հաղթանակեց ներքին առաջնությունում և գավաթում, այնուհետև տիրացավ Եվրոպայի լիգային:

Անդրե Վիլիաշ-Բոաշը դարձավ եվրոպական ֆուտբոլի պատմության ընթացքում ամենաերիտասարդ մարզիչը, որը հաղթել է եվրագավաթներում:

Եվ ահա արդեն այսօր Բոաշը վերադարձավ «Չելսի», սակայն այս անգամ արդեն որպես գլխավոր մարզիչ` կնքելով 3 տարվա պայմանագիր: