Կտրել են

Մեր թերթում տպագրված` «Թաղապետարանը սղոց չունի, ճանապարհային ոստիկանությունը` հավես» հոդվածում (կարդացեք այստեղ) անդրադարձել էինք Բաղրամյան-Մաշտոց խաչմերուկում տեղակայված լուսացույցի պատճառած անհարմարությունների վերաբերյալ վարորդների բողոքներին:

Լուսացույցի դիմաց սյուն է տեղադրված, կողքը ծառ է, եւ երկուսը միասին փակում են վարորդների տեսադաշտը: Արդեն քանի ամիս է՝ այդ իրավիճակն է:

Լուսացույցի տեղափոխումը ճանապարհային ոստիկանության գործն է, սյան տեղափոխումը` քաղաքապետարանի, ճյուղի կտրելը` թաղապետարանի: Նշվածներից ամենաակտիվը ՃՈ-ն էր, այն էլ` լուսացույցը օբյեկտիվ պատճառներով չնկատած վարորդներին տուգանելու հարցում:

Ուրախ ենք վարորդներին տեղեկացնել, որ խնդիրը քաղաքապետարանը կարգավորել է` ծառի ճյուղի հաշվին: Գոհունակություն ենք հայտնում քաղաքային իշխանություններին մեր հրապարակմանը արագ արձագանքելու կապակցությամբ եւ պատրաստ ենք հետայսու եւս անդրադառնալ քաղաքի` լուծում չստացած մյուս խնդիրներին եւս: