Հոր հիշատակն էր դրդել

Հայաստանի վարչապետ Տիգրան Սարգսյանը մայիսյան տոների կապակցությամբ երեկ նաև Վանաձորում` Մեծ հայրենականի հերոսներին նվիրված հուշակոթողին ծաղիկ դրեց:

Ասում է` առավոտյան արթնացավ ու որոշեց, որ գալու է Լոռի, թեեւ դեռ նախօրեին հայտնել էին նրա սպասվելիք այցի մասին:

«Առաջին հերթին հորս հիշատակն է դրդել, որ գամ: Իմ հայրը պատերազմի մասնակից էր, հենց Կիրովականից է մեկնել, եղել է բելառուսական ճակատում, վիրավորվել է,- ասում է վարչապետը:- Հայրս շատ էր կարևորում այս օրը: Որոշեցի օրս դիմավորել իմ հոր ընկերների հետ, շնորհավորել նրանց»:

Տ. Սարգսյանը հանդիպեց Վանաձորի վետերանների հետ, ովքեր վաղ առավոտից տեղեկացել էին նրա գալու մասին ու սպասում էին: Խոսեց վետերանների սոցիալական խնդիրների մասին, ընդունեց, որ նրանց իրականում պակասում է հոգատարությունը պետական մակարդակով, ասաց, որ հարկավոր է նրանց նպաստներն ու կենսաթոշակներն ավելացնել:

Իսկ այն, որ վետերանները դժգոհում են, թե «էս մի օրն են մեզ հիշում», որ նրանց նկատմամբ ուշադրությունը, մեղմ ասած, բավարար չէ, վարչապետը համարում է լրագրողների մեղքը. «Դա նաև ձեր առաքելությունն է, որովհետև նույնիսկ այս տոնական օրը նախընտրում եք քննարկել տնտեսական խնդիրներ, այն պարագայում, որ մենք ձեզ հորդորում ենք մեծարել վետերաններին»:

Աննա Պեչենևսկայա