ՖԻՖԱ-ի նախագահը պարզել է, որ ֆուտբոլ 11 հոգով են խաղում

ՖԻՖԱ-ի նախագահ Յոզեֆ Բլատերը, ով այս օրերին աշխատանքային այցով գտնվում է Մոսկվայում, կարծում է, որ աշխարհի առաջնության հանդիպումներն անցկացնելու համար 12 քաղաքը օպտիմալ քանակ է:

«Ներկայումս Բրազիլիայում` 2014 թ. աշխարհի առաջնության հայտում, 17 քաղաք է ընդգրկված, սակայն մենք այդ թիվը կրճատելու ենք մինչև 14: Իմ կարծիքով` 12 քաղաքը բավական օպտիմալ տարբերակ է աշխարհի գավաթի խաղերի համար»,- ասել է ՖԻՖԱ-ի նախագահը: Ընդ որում` Բլատերն ընդգծել է, որ 2018 թ. աշխարհի առաջնության խաղերն ընդունող քաղաքներն ընտրվելու են ռուսական կողմի և ՖԻՖԱ-ի կողմից:

«12 թիվն ընդամենը իմ անհատական կարծիքն է: Մենք դեռ պետք է լսենք ռուսական կողմի փաստարկներն ու հիմնավորումները: 2018թ. Ռուսաստանում միանշանակ խաղադաշտ դուրս կգան թիմեր, որոնցից յուրաքանչյուրում կլինի 11 ֆուտբոլիստ, իսկ դաշտում կլինի մեկ գնդակ»,- հայտարարել է Բլատերը:

Ռուսաստանի հայտում ընդգրկված են 13 քաղաք-հավակնորդներ: Քաղաքների վերջնական ցուցակը կհրապարակվի ավելի ուշ: