Հակամարտության կարգավորումն առավել քան անհրաժեշտ է

Իսրայելա-պաղեստինյան հակամարտության խաղաղ կարգավորումը հիմա «առավել քան անհրաժեշտ է»` կապված մերձավորարեւելյան իրադարձություններ հետ. երեկ Սպիտակ տանը Իսրայելի նախագահ Շիմոն Պերեսի հետ հանդիպումից հետո հայտարարել է ԱՄՆ նախագահ Բարաք Օբաման:

«Երկուսս էլ համարում ենք, որ արաբական աշխարհից փչող փոփոխության քամիները ոչ միայն մարտահրավեր են, այլեւ հնարավորություն»,-ասել է նա:

Պերեսն, իր հերթին, հայտարարել է, որ իրենք չեն ցանկանում մահմեդական աշխարհի հետ հակամարտության մեջ գտնվել. «Մենք ցանկանում ենք բարեկամություն անել: Մենք խաղաղություն ենք ուզում»:

Իսրայելի եւ Պաղեստինյան ազգային ինքնավարության միջեւ երկխոսությունը դադարեցվել է 2008-ի վերջին: 2010 թվականի սեպտեմբերի 2-ին, ԱՄՆ միջնորդությամբ, այն վերսկսվել է: Մինչ օրս Պաղեստինի ազգային ինքնավարության ղեկավար Մահմուդ Աբասի եւ Իսրայելի վարչապետ Բենիամին Նեթանյահուի միջեւ տեղի է ունեցել 3 հանդիպում: Սակայն բանակցությունները դարձյալ վտանգվել են, քանի որ իսրայելական կողմը հրաժարվում է երկարացնել Գազայի հատվածում բնակավայրեր կառուցելու մորատորիումը: