Բողոքի ակցիան շարունակվում է

Հրազդան քաղաքի Սահմանադրության հրապարակում շարունակվում է բողոքի ակցիան` «ի պաշտպանություն առողջության եւ շրջակա միջավայրի»:

Հրապարակում հավաքված է 100-150 մարդ, նրանք պահանջում են կասեցնել Հրազդանի երկաթի հանքերի շահագործումը:

Բողոքի ակցիային մասնակցում են ինչպես ճանաչված բնապահպաններ, այնպես էլ մարզի բնապահպանական կազմակերպությունների ներկայացուցիչներ, սակայն Հրազդանի քաղաքապետարանի եւ Կոտայքի մարզպետարանի որեւէ ներկայացուցիչ չկա:

Ի դեպ, բողոքի ակցիայի մասնակիցները հնարավորություն չունեն բարձրախոսներով ելույթ ունենալու, քանի որ տարածքը հոսանքազրկվել է: Սակայն ժողովուրդը շարունակում է վանկարկել. «Մեր առողջության հաշվին մեզ աշխատանք պետք չէ»: