Ցմահ դատապարտվածը հացադուլ է հայտարարել

Հայաստանում առաջինը ցմահ ազատազրկման դատապարտված Մանուկ Սեմերջյանի ազատազրկման քսան տարին լրացել է 2011 թվականի փետրվարի 2-ին, սակայն օրենքով նախատեսված վաղաժամկետ ազատ արձակման համակարգը չի գործել։ Մանուկ Սեմերջյանի թղթածրարը նախատեսված մեկ ասվա ընթացքում չի ուղարկվել վաղաժամկետ ազատ արձակման հանձնաժողովին. տեղեկացնում է Պատժի առավելագույն չափի դատապարտվածների իրավունքների պաշտպանության ՀԿ-ն:

2011 թվականի մարտի 10-ին Մանուկ Սեմերջյանին բանավոր փոխանցվել է, թե 56 ՀՀ դրամ պարտքի պատճառով նրա վաղաժամկետ ազատ արձակման խնդրի քննարկումը մերժվել է։

Երբ նա բողոքել է օրենքի կրկնակի խախտման դեմ, նրա նկատմամբ կիրառվել է պատժիչ միջոցառում` խցի լուսամուտին տեղադրվել է օդափոխումը խափանող ճաղավանդակ։

Մանուկ Սեմերջյանը եւ նրան աջակցող մի քանի դատապարտյալների մարտի 12-ին հացադուլ են հայտարարել։ Ցմահ դատապարտվածը հանդիպում է պահանջում արդարադատության նախարար Հրայր Թովմասյանի հետ։

Մանուկ Սեմերջյանի շահերի պաշտպան, փաստաբան Նարինե Ռշտունին պատրաստվում է դատական գործ հարուցել «Նուբարաշեն» քրեակատարողական հիմնարկի օրինախախտ պետ Տիգրան Նավասարդյանի դեմ: