"Մեծ ութնյակը" քննարկել է մերձավորարեւելյան իրավիճակը

Այսօր «Մեծ ութնյակի» արտգործնախարարները Փարիզում քննարկել են երկրաշարժից տուժած Ճապոնիային օգնություն տրամադրելու հարցը եւ մերձավորարեւելյան իրավիճակը:

Վերջինիս վերաբերյալ Ֆրանսիայի արտգործնախարար Ալեն Ժյուպեն հայտարարել է, որ իր երկիրը ողջունում է Արաբական պետությունների լիգայի կոչը ՄԱԿ-ի Անվտանգության խորհրդին` Լիբիայի օդային տարածքը փակ հայտարարել Մուամար Քադաֆիի ռազմական օդուժի համար:

Երեկ «ութնյակի» աշխատանքային ճաշից հետո նախարարը լրագրողներին հայտնել էր, որ դեռեւս չի կարողացել համոզել իր գործընկերներին Տրիպոլիի նկատմամբ ռազմական գործողություններ իրականացնել: Միաժամանակ, ըստ նրա, «ութնյակը» պատրաստ է քննարկել թեման ՄԱԿ-ի ԱԽ շրջանակներում:

Մերձավորարեւելյան կարգավորմանը վերաբերող բանավեճն այսօր բացել է ՌԴ արտգործնախարար Սերգեյ Լավրովը: Նա ընդգծել է, որ տարածաշրջանի լարված իրադրությունը չի կարող պատճառ լինել Պաղեստինի ազգային վարչակազմի եւ Իսրայելի միջեւ բանակցությունների վերսկսումը հետաձգելու համար: Ռուսաստանի կարծիքով` դա Մերձավոր Արեւելքում կարող է կայունացնող գործոն դառնալ: