Մաքսային հսկողությունից թաքցրել են հին մատենագրեր

Պետեկամուտների կոմիտեի մաքսանենգության դեմ պայքարի և կրկնակի մաքսային հսկողության վարչության աշխատակիցներն օրերս հայտնաբերել են մաքսային հսկողությունից թաքցված մատենագրեր` Վենետիկի Սուրբ Ղազար կղզում և Կոստանդնուպոլսում հրատարակված աղոթագրքեր, ամենահինը` 1809-ին տպագրված, նաեւ արծաթյա իրեր:

Ինչպես տեղեկացնում է ՊԵԿ մամուլի ծառայությունը, պատմական արժեք ներկայացնող բոլոր այդ իրերը, մաքսային հսկողությունից թաքցնելով, փորձել էր ներմուծել ՀՀ քաղաքացի Արտակ Բալոյանը: Վերջինս հանրապետություն էր մուտք գործել Բավրայի մաքսակետով` Թուրքիայից ժամանած երթուղային ավտոբուսով:

Ա.Բալոյանը մաքսային ծառայության աշխատակիցներին ասել էր, թե այդ իրերն իրեն փոխանցել է մայրը` Հայաստան տեղափոխելու նպատակով, սակայն սահմանը հատելիս իբր «մոռացել է, որ դրանք իր ճամպրուկում են» և չի հայտարարագրել:

Հայտնաբերված մատենագրերն ու արծաթյա իրերն ուղարկվել են փորձաքննության` մշակույթի նախարարության մշակութային արժեքների փորձագիտական կենտրոն: