Մահացել է Համլետ Թամազյանը

Կյանքից  հեռացել է «Միքայելյան վիրաբուժական ինստիտուտ» ՓԲԸ-ի նախագահ, առողջապահության նախարարության ազգային ինստիտուտի վիրաբուժական նեղ մասնագիտությունների ամբիոնի վարիչ, գիտությունների դոկտոր, պրոֆեսոր Համլետ Թամազյանը:

Նա 231 գիտական աշխատության, այդ թվում` 12 մենագրության, 5 գյուտի, 4 մեթոդական ձեռնարկի հեղինակ էր: Պրոֆեսոր Թամազյանը 8 դոկտորական ատենախոսության եւ 37 թեկնածուական թեզի գիտական ղեկավար էր: Նրա ղեկավարությամբ 108 կլինիկական օրդինատորներ եւ ասպիրանտներ ստացել են իրենց հետդիպլոմային կրթությունը:

Արցախի պատերազմական գործողությունների ժամանակ վիրավոր ազատամարտիկների վիրաբուժական օգնությունը բարձր որակով կազմակերպելու համար Լեռնային Ղարաբաղի Հանրապետության նախագահի հրամանով պարգեւատրվել է Արցախի «Մարտական ծառայություն» մեդալով (2000թ.):

Հայաստանի Հանրապետության անկախության հռչակման 18-րդ տարեդարձի առթիվ առողջապահության զարգացման գործում ունեցած նշանակալի ավանդի համար ՀՀ նախագահ Սերժ Սարգսյանի հրամանագրով պարգեւատրվել է Մխիթար Հերացու մեդալով:

2003 թ. Լոռու եւ Տավուշի մարզերի ազգաբնակչության գերակշիռ ձայներով մեծամասնական կարգով ընտրվել է ՀՀ Ազգային ժողովի 3-րդ գումարման պատգամավոր: