Քաղաքացիների հողօգտագործման իրավունքը վերականգնվելու է

Փետրվարի 23-ին Երևանի քաղաքապետարան են հրավիրվել մայրաքաղաքի Սիլիկյան, Չարբախ թաղամասերում բնակվող շուրջ մեկ տասնյակ բնակիչներ՝ ստանալու իրենց հողամասերի նկատմամբ իրավունքի ձևակերպման վերաբերյալ Երևանի քաղաքապետի որոշումները։

Դեռևս 1990-ական թվականներին այդ թաղամասերի և նախկին Հաղթանակ գյուղի տարածքում հողատարածքներ են հատկացվել մոտ 1300 ընտանիքի: Անշարժ գույքի կադաստրի պետական կոմիտեն այդ քաղաքացիներից ընդունել է դիմումներ և կատարել պետական գրանցումներ: 2005-ից մինչ օրս հողամասերի հատկացման հիմքերը վերականգնելու և հողամասերի հատակագծեր թողարկելու հարցի լուծում է տրվել միայն առանձին դեպքերում:

Հարցի կանոնակարգման համար, ըստ գործող օրենսդրության, անհրաժեշտ է Երևանի քաղաքապետի որոշումը և հողամասերի գլխավոր հատակագիծը: Երևանի քաղաքապետի հանձնարարությամբ` փետրվարի 7-ից գործընթացը վերսկսվել է:

Նշենք, որ երկու շաբաթվա ընթացքում քաղաքապետարան է դիմել մոտ 30 ընտանիք։ Դիմումների մերժման դեպքում քաղաքացիներին ներկայացվում է մերժման պատճառը՝ համակողմանի հիմնավորված և պարզաբանված պատասխանով:

Իսկ Հաղթանակ գյուղում հողհատկացումների օրինականությունը հանձնաժողովը կուսումնասիրի առանձին և համապատասխան առաջարկություն կներկայացնի 3 ամսվա ընթացքում. տեղեկացնում է Երևանի քաղաքապետարանի տեղեկատվության եւ հասարակայնության հետ կապերի վարչությունը: