Պատերազմը կարող է հանկարծակի բռնկվել

Պատերազմի վերսկսման հավանականությունը փոքր է, բայց, հաշվի առնելով Ադրբեջանի հայտարարությունները եւ նրա կողմից զինադադարի հաճախակի խախտումները, չի բացառվում, որ կարող է հանկարծակի, չնախատեսված բռնկում լինել, որն էլ կվերածվի պատերազմի. այսօր լրագրողների հետ հանդիպման ժամանակ ասաց ՀՅԴ Հայ դատի եւ քաղաքական հարցերի գրասենյակի պատասխանատու Կիրո Մանոյանը:

Նրա խոսքերով` անհրաժեշտ է Ադրբեջանին հասկացնելը, որ նման գործողություններն ընդունելի չեն:

Սակայն մինչ այժմ միջազգային հանրությունն այդ քայլերը չի արել եւ հավասարություն է դրել երկու կողմերի միջեւ` երկուսին էլ խաղաղության կոչեր անելով:

Կ. Մանոյանը նշեց, որ Հայաստանի նախագահի եւ բարձրաստիճան այրերի` մոտ ապագայում կայանալիք հանդիպումները գերտերությունների դիվանագետների հետ միտված են հենց այդ պատերազմի հավանականությունը կանխելուն:

Ինչ վերաբերում է Արցախյան հարցի կարգավորմանը, ապա այն հազիվ թե մոտ ժամանակերս լինի: Ըստ Կ. Մանոյանի` պատճառն այն է, որ Ադրբեջանն ինքնորոշման իրավունքը սխալ է հասկանում. նրա պատկերացմամբ` հնարավոր է, որ ազգն ինքնորոշվի Ադրբեջանի սահմաններում, այնինչ միջազգային իրավունքում դա այլ կերպ է սահմանվում: