Վարդան Այվազյանը ապացուցելու խնդիր չունի

«Էնքան ծեծված թեմա է, որ ես ամեն անգամ պետք է փորձեմ ապացուցել, որ... Ես ապացուցելու խնդիր չունեմ: Ի՞նչ փորձեմ ամեն անգամ ապացուցել, որ ես ես եմ կամ ես այլ մեկը չեմ»,- ԱԺ պատգամավոր Վարդան Այվազյանն այսօր «Երկիր»-ի հետ զրույցում մեկնաբանեց իր անվան շուրջ պտտվող լուրերը:

Տեղեկություն է հրապարակվել, թե Հայաստանում ԱՄՆ նախկին դեսպան Էնթոնի Գոդֆրին 2007-ին ԱՄՆ ուղարկած մի զեկույցում ներկայացրել է, թե ՀՀ բնապահպանության այն ժամանակվա նախարար Վարդան Այվազյանը ցանկացել է մի քանի հանքավայրերում ոսկու արդյունահանմամբ զբաղվող ամերիկյան Global Gold Corporation ընկերության տնօրինությունից 3 մլն դոլար շորթել:

Վ. Այվազյանը «Երկիր»-ին ասաց, թե այս հարցը բազմիցս բարձրացվել է եւ մոտ 5 տարի առաջ նույնիսկ քննարկվել է կառավարության կողմից, սակայն ոչ մի արտառոց բան չի բացահայտվել. «Հրապարակումներից հետո ես մի հինգ անգամ եղել եմ ԱՄՆ-ում, մասնակցել եմ հազար ու մի բանի: Եթե որեւէ խնդիր լիներ...»:

Այդ փաստաթղթում նշված է, թե ամերիկյան ընկերության տնօրենն իրենց տեղեկացրել է, որ Վարդան Այվազյանն իրենց ընկերության իրավաբան Աշոտ Պողոսյանից 2005-ի հուլիսին պահանջել է իր մտերիմ եւ գործընկեր ՀՀ ԱԺ պատգամավոր Մուրադ Գուլոյանին վճարել 3 միլիոն դոլար կաշառք:

Այս մասին Վ. Այվազյանն ասաց. «Կաշառք պահանջելը ո՞րն է: Այսինքն` ես էնքան հիմար էի, որ կանգնեի ինչ-որ... Ճանաչո՞ւմ եք էդ անձնավորությանը: Դե որ կտեսնեք` կարծիք կկազմեք: Կաշառք պահանջեմ, հենա ինձ համար կպահանջեմ, Գուլոյանի համար ինչի՞ եմ պահանջում: Հիմա դա կարդում եմ, իմ ծիծաղն էլ է գալիս»: