Վիճակը կայուն է եւ հանգիստ

Ըստ Համաշխարհային առողջապահական կազմակերպության` 2011-ին աշխարհում շնչառական սուր վարակիչ հիվանդությունների հարցում գրանցվել է չափավոր լարվածություն: Վիճակը կայուն է եւ հանգիստ նաեւ Հայաստանում. այսօր մամուլի ասուլիսում հայտնեց ՀՀ առողջապահության նախարարության հիգիենիկ համաճարակային տեսչության պետ Արտավազդ Վանյանը:

Շնչառական հիվանդությունների բարձր ցուցանիշ է գրանցվել ԱՄՆ 17 նահանգներում, Գերմանիայում, Սկանդինավյան երկրներում, Չեխիայում, Ռուսաստանում եւ Վրաստանում:

Հայաստանում այս պահին տարածված է հարբուխի B տեսակը, որը համարվում է միջին բարդության. կանխարգելիչ միջոցառումներն ու բուժումը նույնն են, ինչ սովորական հարբուխների դեպքում: Ամենօրյա մոնիտորինգ է իրականացվում մանկապարտեզներում, դպրոցներում, բուժկանխարգելիչ կետերում:

Ներկայումս Հայաստանում կա շնչառական հիվանդություններով վարակված 180 հիվանդ:

Թեեւ Հայաստանում վիճակն առայժմ հանգիստ է, բանախոսը հորդորում է` հիվանդ լինելու դեպքում մնալ տանը` ուրիշներին չվարակելու համար, եւ անմիջապես դիմել բժշկի: