Նոր փաստեր Սադամ Հուսեյնի հարցաքննություններից

Նոր հետաքրքիր փաստեր են ներկայացված Ռոն Քեսլերի՝ Սադամ Հուսեինի մասին պատմող «Ահաբեկչի ժամանակը» գրքում: Հեղինակը գրի է առել Հետաքննությունների դաշնային բյուրոյի հատուկ նշանակության գործակալ  Ջորջ Պիրոյի հիշողությունները, վերջինս մոտ ութ ամիս շարունակ այցելել է բանտարկված Սադամ Հուսեյնին:

Պիրոյին հաջողվել ընկերական հարաբերություններ հաստատել նախկին բռնակալի հետ: Նա պատմում է, որ Հուսեյնին հարցաքննում էին հատուկ եւ տարօրինակ մեթոդներով: Նրան հյուրասիրում էին սուրճ, արեւելյան քաղցրավենիք, կուբայական սիգարներ՝ կարծելով, թե ճոխության սովոր Հուսեյնը, հաճույքներով տարվելով,  ավելի հեշտությամբ կխոստովանի ամեն բան:

Սակայն ըստ Պիրոյի, ԱՄՆ-ը թերագնահատել էր Սադամին. նա բոլորովին էլ պարզունակ եւ անգրագետ բռնակալ չէր, ինչպես կարծում էին:  Պիրոյի խոսքերով՝ նա ոչ միայն բնատուր խելք ուներ, նաեւ շատ զարգացած էր:

Գրքում խոսվում է այն մասին, որ Սադամն այնքան է վստահել, Պիրոյին, որ իբր նրան խոստովանել է, թե ինքն իսկապես հրամայել է ոչնչացնել 180 000 քրդերի, եւ  բոլորովին չի ափսոսում դրա համար, ափսոսում է միայն, որ արդեն ավելին չի կարող անել:  Հուսեյնը Պիրոյին նաեւ ասել է, որ զանգվածային ոչնչացման զենք չունի, բայց շատ կուզենար ունենալ:

Նմանատիպ շատ ու շատ փաստեր կան Քեսլերի գրքում, սակայն դեռեւս պարզ չէ՝ դրանք իրական փաստե՞ր են, թե՞ պարզապես սենսացիայի եւ գրքի լավ վաճառքի համար հորինված նյութեր:

Պաշտոնական Վաշինգտոնը դեռեւս ոչ մի կերպ չի արձագանքել այս գրքին: