Հայկական դիվանագիտությունը հմտության պակաս ունի

«Գործընթացը, որ մեզանում հայտնի է որպես «ֆուտբոլային դիվանագիտություն», ինչպես նաեւ դրա արգասիք հանդիսացող երկու արձանագրությունները չմտածված ու դրսից հրամցված տարբերակ էին»,- կարծիք է հայտնել ՀՀ նախկին արտգործնախարար Ալեքսանդր Արզումանյանը: «Ես  համարում եմ ֆուտբոլային բլեֆը սպառված, հիմա ժամանակն է, որ կողմերն ավելի սթափ վերսկսեն քննարկումներն ու զրոյից մտածեն նոր ստարտի մասին»,-հայտարարել է նախկին արտգործնախարար Ալեքսանդր Արզումանյանը:

Ինչ վերաբերում է 2011-ի կանխատեսումներին, ապա Ալ.Արզումանյանը դա անշնորհակալ գործ է համարում, բայցեւ նշում է, որ միջազգային հանրությունը դժվար թե մեծ նշանակություն տա Ղարաբաղյան հարցի կարգավորմանը: «Այս իշխանությունը չունի ոչ ներքին, ոչ արտաքին լեգիտիմություն, բավականին հաջող կերպով կարողանում է խուսանավել, եւ առաջիկայում էլ ստատուս քվոն պահպանելով փորձելու է ամեն ինչ անել, որ հարցը մտնի մյուսների նախընտրական փուլ»,-հայտարարել է նա:

2011-ի ամենակարեւոր մարտահրավերն, ըստ Արզումանյանի, պատերազմի վերսկսումն է. «Պետք է ամեն ինչ անել` թույլ չտալու, որ պատերազմ սկսվի: Որեւէ հարց չարժի որեւէ հայ զինվորի կյանք»: Նախկին պաշտոնյան խորհուրդ է տալիս հմուտ դիվանագիտություն բանեցնելով գտնել Ղարաբաղյան հարցի լուծման բանալին: