Ադրբեջանը սպառնում է Ռուսաստանին` արցախյան արտադրանք ներկրելու համար

2010-ի դեկտեմբերին լուր էր տարածվել, թե Կրասնոդարի խանութներում վաճառվում է «Արցախ ֆրուտ» ՍՊԸ-ի արտադրանքը, որը հաճախորդների գոհունակությունն է վայելում: Սակայն հայկական արտադրանքի Ռուսաստան ներկրելու հանգամանքի վերաբեյալ Ադրբեջանի արտգործնախարարության նյարդային կերպով արձագանքեց:  

«Ռուսաստանում Ադրբեջանի դեսպանին հանձնարարական է տրվել այդ ինֆորմացիայի հավաստիությունը ճշտելու վերաբերյալ: Եթե դրա ճշմարտացիությունը հաստատվի, ապա ադրբեջանական կողմը համապատասխան քայլեր կձեռնարկի»,- ասել է Ադրբեջանի ԱԳՆ մամուլի քարտուղար Էլհան Պոլուխովը:

Թե որոնք կլինեն «համապատասխան քայլերը» դեռեւս պարզ չեն, սակայն, եղած տեղեկության համաձայն, նախատեսվում է, որ Ադրբեջանի նախագահ Իլհամ Ալիեւը դիմելու է Ռուսաստանի ադրբեջանական համայնքին եւ կոչ է անելու` արհամարհել «Արցախ ֆրուտ» ՍՊԸ-ի արտադրանքը:

Նշենք, որ «Արցախ ֆրուտի» արտադրանքը վաճառվում է Ռուսաստանի շատ շրջաններում: Ստեփանակերտում գործող ընկերությունը արտադրում է աներեւակելիորեն համեղ եւ բազմատեսակ մթերքներ` մուրաբաներ, ջեմեր, հյութեր, մարինադներ եւ այլ պահածոներ:

«Արցախ ֆրուտի» գնորդները խոսում են արտադրանքի բարձր որակի, տնական ուտելիքի համ ունենալու, օգտակար հատկությունների եւ մատչելի գնի մասին: Այս ամենը բացատրվում է նրանով, որ արտադրանքի համար օգտագործվում է բացառապես բնական հումք:

«Արցախ ֆրուտը» օգտագործում է աշխարհում հայտնի եվրոպական ֆիրմաների տեխնոլոգիաները, ունի իր սեփական հետազոտական լաբորատորիան եւ հատուկ ուշադրություն է դարձնում ինչպես հումքի, այնպես պատրաստի ապրանքի որակի վերահսկմանը:

Իսկ բարձր որակավորում ունեցող անձակազմը այս ոլորտում ունի մեծ փորձառություն, ինչպեսեւ իր սեփական յուրահատուկ բաղադրատոմսերը: Ահա այս ռեսուրսների շնորհիվ էլ  արտադրվում են տնական համ ունեցող բնական մթերքները: Տեխնոլոգիաները թույլ են տալիս պահպանել մրգերի եւ հատապտուղների ոչ միայն բնական համն ու հոտը, այլեւ Արցախի բնությունից տրված օգտակար հատկությունները:

Այս մասին հաղորդում է «Երկրամասը»: