Թուրքմենստանից Իրանի միջոցով գազ ներկրելու քննարկումներ կան, բայց տեղաշարժ չկա. Աշոտ Մանուկյան

ԱԺ-ն շարունակում է քննարկել «Ելք» խմբակցության այն հարցապնդումը, որը վերաբերում է ՀԷՑ և «Գազպրոմ Արմենիա» ընկերությունների վերջին տասը տարվա գործունեությանը:

Հիմնական զեկուցող` էներգետիկ ենթակառուցվածքների և բնական պաշարների նախարար Աշոտ Մանուկյանը հայտնեց, որ Թուրքմենստանից Իրանի միջոցով Հայաստան գազ ներկրելու վերաբերյալ քննարկումները միշտ էլ եղել են և ներկայումս էլ կան:

«Թեպետ քննարկումներ կան, բայց այդ հարցում որևէ տեղաշարժ չկա: Տեղաշարժ չկա, որովհետև մեզ առաջարկվող գները մրցունակ չեն մեր կողմից ստացվող գազի գնի հետ»,- ասաց նախարարը:

ՀՀ ԱԺ փոխնախագահ Էդուարդ Շարմազանովը նշեց. «Փաստորեն, կարելի է արձանագրել, որ Ռուսաստանից ստացվող գազի գինն ավելի մրցունակ է, և դրանից ավելի մրցունակ առաջարկ Հայաստանը չի ստացել»: Նախարարն արձագանքեց. «Այո, պարո'ն Շարմազանով, շատ ճիշտ հասկացաք»: