Տոնական օրերին շփման գծում համեմատաբար հանգիստ էր

Նախատոնական օրերի համեմատ ադրեջանա-ղարաբաղյան շփման գծում հունվարյան առաջին 7 օրերին համեմատաբար հանգիստ է եղել: Այս մասին Երկիրի թղթակցին տեղեկացրել է ԼՂՀ պաշտպանության նախարարության մամլո խոսնակ Սենոր Հասրաթյանը:

Նրա տեղեկացմամբ` հունվարի առաջին 7 օրերին ադրբեջանա-ղարաբաղյան շփման գծի տարբեր հատվածներում հրադադարի 81 խախտում է արձանագրվել , որի ընթացքում հակառակորդի կողմից շուրջ 500 կրակոց է արձակվել` "СВД”, "ПК”, "УТЁС”, ”РПГ”  եւ այլ տիպի փոքր ու խոշոր տրամաչափի հրաձգային զենքերից:

“Ղարաբաղյան կողմը կորուստներ չի ունեցել: Պաշտպանության բանակի համարժեք գործողություններից հետո հակառակորդը լռել է”,-նշել է Սենոր Հասրաթյանը` ավելացնելով, որ այն ինչ Ադրբեջանի պաշտպանության նախարարության մամուլի խոսնակն է տարածում, թե իբր հայկական ուժերն են խախտում հրադադարի ռեժիմը, հերթական ապատեղեկատվություն է եւ իրականությանը չի համապատասխանում, ինչի մասին վկայում են վերոնշյալ տվյալները: