Վարդգես Սուրենյանցի ավելի քան 200 նկարները՝ մեկ ցուցահանդեսում

Հայկական գեղանկարչությունում պատմական ժանրի հիմնադրի՝ Վարդես Սուրենյացի ծննդյան 150-ամյակին նվիրված միջոցառումները, որ մեկնարկել էին տարեսկզբին, այսօր համալրվեցին Հայաստանի ազգային պատկերասրահում բացված ցուցահանդեսով:

Հայաստանի չորս թանգարաններում և ազգային պատկերասրահում պահվող նկարչի ամբողջ ժառանգությունը՝ 200 գործ ներառել է նկարիչ, ճարտարապետ և թարգմանիչ Վարդգես Սուրենյանցի հոբելյանական ցուցահանդեսը, որի բացմանը մասնակցեցին նաեւ ՀՀ վարչապետ Տիգրան Սարգսյանն ու մշակույթի նախարար Հասմիկ Պողոսյանը:

Հոբելյանական միջոցառումների շարքում լույս է տեսել հեղինակի գրաֆիկական աշխատանքների գիտական կատալոգ, իսկ պետպատվերով հրատարակվում է արվեստագետի Հայաստանի ազգային պատկերասրահում պահվող 200 գործերի երկլեզու՝ հայերեն և անգլերեն ալբոմ՝ Նկարչին նվիրված գիտաժողով է անցկացվել, թողարկվել են նրա անունով նամականիշ և «Վարդգես Սուրենյանց - 150» հուշամեդալ:

Ի դեպ, «Շողակաթ» հեռուստաընկերության Վարդգես Սուրենյանցի հոբելյանի կապակցությամբ նկարահանած ֆիլմը, որ նախատեսված էր ներկայացնել ցուցահանդեսի բացման ժամանակ փոխարինվել է արդեն ցուցադրված մեկ այլ ֆիլմով: