ԱՄՆ-ն պատժամիջոցներ է կիրառում, երբ ի վիճակի չէ դիվանագիտություն վարել. Իրանի ԱԳՆ

ԱՄՆ-ն դիմում է տնտեսական պատժամիջոցների, երբ չի կարողանում դիվանագիտություն վարել. սա դարձել է սովորություն և կախվածություն, ասել է Իրանի արտաքին գործերի նախարարության խոսնակ Իսմայիլ Բաղային։

«ԱՄՆ ֆինանսների նախարարը պարծենում էր Իրանի դեմ տնտեսական պատժամիջոցներով։ Մաքուր պաթոսից այն կողմ, այս հայտարարությունը հստակ վկայում է պատժամիջոցներից Ամերիկայի մոլուցքային կախվածության մասին։ Երբ Վաշինգտոնը չի կարողանում դիվանագիտություն վարել, նա նահանջում է պատժամիջոցների, և երբ այդ պատժամիջոցները ձախողվում են, պարզապես մեծացնում է դրանց դեղաչափը։ Սա այլևս «քաղաքականություն» չէ, այլ «սովորություն», և ավելի վտանգավոր է, դա կախվածություն է, որը դուրս է մղել մտածողությունն ինքնին», – գրել է Բաղային՝ իր X սոցիալական ցանցի էջում։

Նա զգուշացրել է ամերիկացի քաղաքական գործիչներին, որ կառչելով այս սովորությունից, նրանք կարող են խեղդել իրենց սեփական «մնացած հնարավորությունները՝ իրենց իսկ ստեղծած ճգնաժամից ավելի քիչ նվաստացուցիչ դուրս գալու համար»։