Զելենսկին պատժամիջոցներ է սահմանել Բելառուսի նախագահ Լուկաշենկոյի նկատմամբ

Ուկրաինայի նախագահ Վլադիմիր Զելենսկին հայտարարել է Բելառուսի նախագահ Ալեքսանդր Լուկաշենկոյի նկատմամբ պատժամիջոցներ սահմանելու մասին՝ նրան մեղադրելով Ռուսաստանի կողմից Ուկրաինայի դեմ տարվող պատերազմի աջակցման մեջ։

Զելենսկու խոսքով՝ Լուկաշենկոն երկար ժամանակ «փոխանակում է երկրի ինքնիշխանությունը սեփական իշխանության դիմաց» և աջակցում է Ռուսաստանին՝ շրջանցելու միջազգային պատժամիջոցները։ Նա նաև նշել է, որ Մինսկը արդարացնում է Մոսկվայի գործողությունները։

Ուկրաինայի նախագահը հավելել է, որ Բելառուսը մեծացնում է իր ներգրավվածությունը պատերազմում, ինչը, նրա ձևակերպմամբ, կարող է հանգեցնել «հատուկ հետևանքների»։

Ավելի վաղ մի շարք լրատվամիջոցներ հայտնել էին, որ ուկրաինական իշխանությունները բելառուսական ընդդիմության ներկայացուցիչների հետ քննարկում են Լուկաշենկոյի դեմ քրեական գործ հարուցելու հնարավորությունը։ Ըստ հրապարակումների՝ այդ քայլը կարող է ազդել միջազգային հարթակում նրա մեկուսացման հարցի վրա։