Կրեմլը գնահատել է Ուկրաինայի հարցի խաղաղ կարգավորման ուղղությամբ Թրամփի ջանքերը

Եվրոպացի քաղաքական գործիչների գործողությունները կտրուկ հակադրվում են ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի մոտեցմանը, հայտարարել է ՌԴ նախագահի մամուլի քարտուղար Դմիտրի Պեսկովը, հաղորդում է «ՌԻԱ Նովոստի»-ն։

Պեսկովը, մեկնաբանելով արևմտաեվրոպացի առաջնորդների կոշտ հայտարարությունները, նշել է, որ «Եվրոպայի պատերազմի կուսակցությունը պահպանում է իր հիմնական միտումը, նրանք չեն հանդարտվում»։ Տեսանյութը հրապարակվել է «Ռոսիա 1» հեռուստաալիքի լրագրող Պավել Զարուբինի Telegram-ալիքում։

«Սա կտրուկ հակադրվում է այն մոտեցմանը, որին հետևում է մեր նախագահ Պուտինը, ինչպես նաև ԱՄՆ նախագահ Թրամփը», – ասել է Պեսկովը։

Բացի այդ, ըստ Կրեմլի ներկայացուցչի, ԱՄՆ նախագահ Դոնալդ Թրամփի ջանքերը՝ Ուկրաինայում գործընթացը խաղաղ հուն տեղափոխելու ուղղությամբ, դժվար է գերագնահատել։

«Նրա (Թրամփի – խմբ.) ջանքերը՝ գործընթացը խաղաղ հուն տեղափոխելու ուղղությամբ, դժվար է գերագնահատել, և մենք երախտապարտ ենք նրան այդ ջանքերի համար», – ասել է Պեսկովը։