Իրան-Իսրայել հրադադարի համաձայնագիրն ուժի մեջ է մտել

Իսրայելը համաձայնել է ԱՄՆ նախագահ Դոնալդ Թրամփի՝ Իրանի հետ հրադադար հաստատելու նախաձեռնությանը, հայտնել է վարչապետ Բենիամին Նեթանյահուի գրասենյակը։ Հրեական պետությունը խոստացել է վճռականորեն արձագանքել ցանկացած խախտման։

«Իսրայելի քաղաքացիները պետք է շարունակեն հետևել Ներքին ճակատի հրամանատարության հրահանգներին մինչև հրադադարի լիարժեք պահպանումը»,-«ՌԻԱ նովոստի»-ի փոխանցմամբ հայտարարել է գերատեսչությունը։

Երեքշաբթի երեկոյան ԱՄՆ նախագահ Դոնալդ Թրամփը հայտարարել է, որ Թեհրանը և Թել Ավիվը համաձայնության են եկել հրադադարի շուրջ, որը 24 ժամ անց պետք է դառնա «12-օրյա պատերազմի պաշտոնական ավարտ»։ Նրա խոսքով՝ Իրանը նախ կդադարեցնի կրակը, իսկ Թել Ավիվը՝ 12 ժամ անց։

Այսօր ավելի վաղ իրանական Press TV հեռուստաալիքը նույնպես հայտնել է, որ Իսրայելի հետ հրադադարի ռեժիմն ուժի մեջ է մտել։