Իսրայելի հարձակումը Իրանի վրա կարող է հանգեցնել խոշոր հակամարտության. Օմանի ԱԳՆ

Օմանը դատապարտել է Իսրայելի հարձակումն Իրանի վրա, որը, ըստ այդ երկրի ԱԳՆ-ի, կարող է հանգեցնել խոշոր հակամարտության և խոչընդոտում է Վաշինգտոնի ու Թեհրանի միջև միջուկային ծրագրի շուրջ բանակցությունները։ Այս մասին ասվում է Օմանի արտաքին գործերի նախարարության հայտարարության մեջ, որը միջնորդ է հանդես գալիս Իրանի միջուկային ծրագրի շուրջ ստեղծված ճգնաժամը լուծելու բանակցային գործընթացում։

«Այս հարձակումը տեղի է ունենում չափազանց զգայուն պահին, քանի որ ակտիվացել են Իրանի Իսլամական Հանրապետության և Միացյալ Նահանգների միջև միջուկային բանակցությունների վերսկսմանն ուղղված միջազգային ջանքերը: Սա ակնհայտորեն վկայում է դիվանագիտական գործընթացը խափանելու և ավելի լայն հակամարտություն հրահրելու միտումնավոր ձգտման մասին, որը սարսափելի հետևանքներ կունենա տարածաշրջանային և միջազգային կայունության համար»,- նշված է հայտարարության մեջ։

Հիշեցնենք՝ հունիսի 13-ի գիշերն Իսրայելը հարվածել է Իրանի ռազմավարական օբեյեկտներին՝ թիրախավորելով բալիսթիկ հրթիռների գործարաններ ու ռազմական հրամանատարական կենտրոններ։ Իրանի պետական հեռուստատեսության հաղորդմամբ հարձակման հետևանքով զոհվել են Իրանի բարձրագույն ռազմական ղեկավարության և գիտական ոլորտի առանցքային ներկայացուցիչներ։