Բաքվում շարունակվում է կեղծ դատավարությունը. hարցաքննվել է Արայիկ Հարությունյանը

Բաքվում տեղի է ունեցել Արցախի գերեվարված առաջնորդների «դատավարության» հերթական նիստը, այսօր հարցաքննվել է Արցախի նախկին նախագահ Արայիկ Հարությունյանը։

Ըստ ադրբեջանական լրատվամիջոցների` Հարությունյանը խոսել է 2020 թվականին Հայաստանի և Լեռնային Ղարաբաղի անվտանգության խորհուրդների համատեղ նիստին մասնակցելու մասին։ Նա ասել է, որ 2020 թվականին ցանկանում էր բանակցել Ադրբեջանի հետ և վերջնական համաձայնության հասնել։

Հաջորդ «դատական նիստը» կկայանա մայիսի 26-ին։

Հիշեցնենք` հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:

Նախկին պետնախարար և բարերար Ռուբեն Վարդանյանի գործը քննվում է առանձին վարույթով: