Վարորդնե՞րն են ինքնագլուխ վառելիք ծախսում, թե՞ քաղաքապետարանը չի տիրապետում խնդրին

Ավտոբուսի վարորդներն իրենց վերջին բողոքի ակցիայի ժամանակ ասացին, որ ավտոբուսներն ուղևորափոխադրումներ չիրականացնելու ժամանակահատվածում չեն անջատում շարժիչները, որ ավտոբուսներում տեղադրված վճարման համակարգերը (վալիդատորները) չանջատվեն։

Yerkir.am-ը քաղաքապետարանին խնդրել էր պատասխանել պարզաբանում տալ հարցին, միաժամանակ հստակեցնել քանի՞ լիտր դիզվառելիք է ծախսվում ավտոբուսների վալիդատորների անխափան աշխատանքի համար: Քաղաքապետարանի պատասխանում, սակայն, որևէ հստակություն չկար:

Մեր կողմից երկրորդ հարցապնդմանն արդեն քաղաքապետարանը պատասխանել է, որ «ավտուբուսներում տեղադրված վալիդատորներն աշխատունակ պահելու նպատակով ավտոբուսների շարժիչներն անհարկի գործարկելու հրահանգներ Երևանի քաղաքապետարանի կողմից վարորդներին տրված չեն»:

Քաղաքապետարանի պատասխանից այդպես էլ պարզ չդարձավ՝ անհրաժեշտություն կա՞, թե՞ չկա վալիդատորների անխափան աշխատանքի համար ավտուբուսների շարժիչները միացրած պահելու: Եթե չկա, ապա վարորդներն ինչո՞ւ են ինքնագլուխ միացրած պահում և լրացուցիչ վառելիք ծախսում, եթե կա, ապա քաղաքապետարանն ինչո՞ւ չի տիրապետում իր իսկ կողմից ներդրված համակարգի վրա լրացուցիչ ծախսերի ամբողջական պատկերին:

Հ.գ. Մենք կփորձենք մեզ հետաքրքրող հարցերի պատասխաններն ստանալ տեղյակ վարորդներից և ներկայացնել հանրությանը: