Պուտինը դեռ չի հանդիպել Մոսկվա ժամանած Ասադի հետ

ՌԴ նախագահ Վլադիմիր Պուտինը Direct Line-ի եթերում ասել է, որ դեռ չի հանդիպել Մոսկվայում գտնվող Բաշար ալ-Ասադի հետ, սակայն ծրագրում է դա անել։ 

«Ես դեռ չեմ հանդիպել նախագահ Ասադի հետ նրա ժամանումից հետո, բայց ես ծրագրում եմ դա անել», - ասաց նա՝ պատասխանելով համապատասխան հարցին։

Նա ամերիկացի լրագրողին խոստացել է, որ պատրաստ է Ասադին ու սիրիական նոր իշխանությունների ներկայացուցիչներին հարցնել 12 տարի առաջ այդ երկրում անհետացած լրագրող Օսթին Թայսի ճակատագրի մասին։ Թայիսի մայրը Պուտինին նամակ է ուղարկել Direct Line-ին՝ խնդրելով Ասադի միջոցով պարզել որդու ճակատագիրը։

«Ես և դու չափահաս ենք, և մենք հասկանում ենք, որ 12 տարի առաջ Սիրիայում մարդ է անհետացել, մենք հասկանում ենք, թե ինչ իրավիճակ էր այնտեղ, երկու կողմից էլ ակտիվ ռազմական գործողություններ են եղել», - նշել է ՌԴ նախագահը և հավելել, որ վստահ չէ, որ ինքը՝ Ասադը, գիտի այս անհետացած լրագրողի մասին, բայց, այնուամենայնիվ, խոստացել է նրան հարց տալ այս թեմայով առաջիկա հանդիպման ժամանակ։

Հիշեցնենք՝ նոյեմբերի 27-ին «Ջեբհաթ ան Նուսրա»-ի զինյալները խախտել են հրադադարի մասին համաձայնագիրը և գրոհել Սիրիայի Հալեպ և Իդլիբ Նահանգների վրա: Սիրիական բանակին աջակցում են Ռուսաստանի օդատիեզերական ուժերը՝ հարվածներ հասցնելով ահաբեկիչների տեխնիկային, կառավարման կետերին, պահեստներին և հրետանային դիրքերին։ Նոյեմբերի 30-ին հայտնի դարձավ, որ թուրքամետ արմատական խմբավորումները գիշերվա ընթացքում գրեթե ամբողջությամբ գրավել են Սիրիայի Հալեպ քաղաքը, իսկ Հալեպի գլխավոր հյուպատոսությունն ու Հայկական մարդասիրական առաքելությունը տարհանվել են։ Դեկտեմբերի 5-ի երեկոյան հայտնի դարձավ, որ հակակառավարական ուժերը գրավել են Սիրիայի կենտրոնական Համա քաղաքը, դեկտեմբերի 7-ի երեկոյան՝ Հոմսը, իսկ դեկտեմբերի 8-ի առավոտյան՝ մայրաքաղաք Դամասկոսը: Սիրիայի նախագահ Բաշար ալ-Ասադը Դամասկոսի գրավումից հետո մենել էր Մոսկվա։ Դեկտեմբերի 9-ին Իսրայելի ռազմաօդային ուժերը լայնածավալ ռմբակոծություններ են իրականացրել Սիրիայում ռազմական և պաշտպանական օբյեկտների վրա։ Բանակը հատել է սահմանը և գրավել բուֆերային գոտին Գոլանի բարձունքներում։ Նեթանյահուն ասել է, որ Գոլանի բարձունքները հավերժ կմնան Իսրայելի «անբաժանելի մասը»: Գոլանի բարձունքները եղել են Սիրիայի կազմում մինչև 1967 թ.։ Վեցօրյա պատերազմի ժամանակ իսրայելական զորքերը գրավեցին այս տարածքը։ 1973 թվականի Յոմ Կիպուրի պատերազմից հետո կողմերը համաձայնություն կնքեցին զինադադարի և զորքերի բաժանման մասին։ 1974 թվականին Գոլանի բարձունքներում հայտնվեցին ՄԱԿ-ի խաղաղապահ հենակետերը։