Կարող էր տեղի ունենալ աղետ. Սարատով-Երևան չվերթի օդաչուն ինքնաթիռը սխալմամբ իջեցրել է «Էրեբունի»-ում

Շաբաթ օրն իսկական աղետ կարող էր տեղի ունենալ ավիացիոն ոլորտում։ 

24News-ի հավաստի տեղեկությունների համաձայն,  «Շիրակ Ավիա»-ի Սարատով-Երևան չվերթի օդանավի օդաչուն ինքնաթիռը ոչ թե իջեցրել է «Զվարթնոց» օդանավակայանում, ինչպես և պետք է լիներ, այլ  «Էրեբունի»-ում, որը օգտագործվում է ռազմական նշանակության համար։ Ընդ որում, մեզ հասած տեղեկությունների համաձայն, օդաչուն ոչ թե ստիպված է եղել գնալ այդ քայլին, այլ արել է սխալմամբ։ Այս «սխալը» կարող էր ճակատագրական լինել թե' օդանավի անձնակազմի, թե ուղևորների համար։

24News-ն այս առթիվ մեկնաբանություն ստանալու համար դիմեց Քաղավիացիայի կոմիտե, որտեղից մեզ խոստացան ավելի ուշ պատասխանել դեպքի մասին մեր հարցին, իսկ «Շիրակ Ավիա»-ից մեկնաբանություն այս պահին ստանալ դեռևս չի հաջողվել։

Տեղեկությունների համաձայն, արդեն «Էրեբունի» օդանավակայանից ինքնաթիռը կրկին թռել է «Զվարթնոց», որտեղ իջնելուց հետո ուղևորները խստացված հսկողությամբ զննություն են անցել, բոլորի դեմքը նկարել են։